ජනකවිය" #2

අද මම අපේ කවි කිවිඳියන්ට දායාද කරන්න යන්නෙ අපේ පැරණි කමත් කවි.කොල මඩවනකොට සීපද කිව්ව වගේම කමත් කවිත් ගායනාකළා. අපේ පැරණි ගොවියා මේ හැමතැන්කදිම බුදු දහමට මුල් තැනක් දුන්න. ඕනෑම සුබ වැඩක් පටන් ගත්තෙ ත්‍රිවිධ රත්නයට නමස්කාර කරල. ඒවගෙම ගොයම් මඩවන මීහරකටත් ගරුකළා. "මීහරක " කිව්වෙනෑ. "අම්බරුව" කියලයි කිව්වෙ." වහු දරුව" කියල කිව්ව. කමත පූජණීය ස්ථානයක් උනා. ඉතින් මේ හරක මරල අපි කොහොමද මස් කන්නෙ? කියලත් මට එක වෙලාවකට හිතෙනව. කොහොම වෙතත්, අපේ කමත් කවිත් අපි අධ්‍යයනය කරල දැනුම ටිකක් වැඩිකරගමුකො

බුද්ධං. සරණේද බලේ---ධම්මං සරණේද බලේ
සංඝං සරණේද බලේ---මෙතුන් සරණ කමත තුලේ

ඉරු දෙවියෝ වැඩිය තැනේ---බොල්පිණි නොතිබෙයි එතැනේ
සඳ දෙවියෝ වැඩිය තැනේ---කලුවර නොතිබෙයි එතැනේ

මහ ගජතුන් බැන්ඳතැනේ---කණුමුල් නොතිබෙයි එතැනේ
සැම දෙවියන් වැඩිය තැනේ---උවදුරු නොතිබෙයි එතැනේ

වී සහ බිජු වපුළ කලට---ගිරානිල්ල වෙන තරමට
දිය බඳිමින් නිසි තරමට---හීන් බණ්දි වෙන ගොයමට

දිය බඳිමින් නියර උසට---කිරි දීකිරි වදින කලට
කරල් නැමී නැගෙන හිරට---ගොයම් පැසී තිබෙන කලට

නැකත් බලාගොයම් ලියා---කමතට නිසි බිමක් හොයා
නැකත් බලා කමත ලියා---කමත වටට වැල් ඇදයා

කමතත් සැහැ කවය ලෙසට---කැටකර කැට කඳු සමකොට
වටටම වටමළු එක්කොට---කමත සුද්ද කර විගසට

කමත මැදින් අරක් වළක්--- ඒ මැද්දේ ගොන් කණුවක්
කණුවේ මැද පුවක් මලක්---ගොන් කණුවේ ගල ඔටුවක්

දවට පිළල සරි කරගෙන---දෙහි පිළලත් සරි කරගෙන
නුග පිළලත් සරි කරගෙන---බුලත් පිළල හරි කරගෙන

දොඩම් පිළල සරිකරගෙන---ඉළුක් පිළල සරි කරගෙන
ගොයම් පිළල සරි කරගෙන---පිළල හතම සරි කරගෙන

අරක් බෙල්ලා හරිකර ගෙන---රබ්බඩ ගෙඩි හතක් රැගෙන
කදුරු කොලද හරි කරගෙන---වරකා ගැටයක් අරගෙන

මී ගෝරෙන් හරි කර ගෙන---නයි ගෝරෙන් හරි කරගෙන
එළු ගෝරෙන් හරි කරගෙන---අස් ගෝරෙන් හරි කරගෙන

ඇත් ගෝරෙන් හරි කරගෙන---ගොන් ගෝරෙන් හරිකරගෙන
මුව ගෝරෙන් හරි කර ගෙන---ගෝර හතම හරි කරගෙන

රිදී රත්තරන් ඇරගෙන---තඹ පිත්තල සපයාගෙන
ලෝකඩයෙන් වාන් රැගෙන---යකඩෙන් දෑකැත්තක් ගෙන

රත්න ජාති හැකි පමණින---මුතු ඇටයක් සුරැකිව ගෙන
පබළුත් සපයා ඇරගෙන---මෙකී සෑමදේ අරගෙන

නැකත් බලා අරක් තියා---අරක් වළේ බැතත් තියා
ඊට උඩින් ගොයම් තියා---මෙකී ලෙසට නිවැරදෙයා

හරක් ගෙනත් කමත තුලට---බාන් වැලක් රැගෙන අතට
ගලතාලා නිසි හැටියට---දෙවියන් සිහිකරගෙන සිට

මුදුණේ යන ගොන් රජුනේ---ඊලඟ යන වයිරයනේ
කලාත යන නාම්බනේ---මඩව දමව් විගසකිනේ

අං දෙක රං ගාවං ඤ්ඤා---කන් දෙක මුතු අමුනංඤ්ඤා
හුණරේ මුතු අමුනංඤ්ඤා---මෙකී ලෙසට සරසංඤ්ඤා

ගොන් යන්නේ කඳු බොඩළුෑ---අලතන්නේ කරවැලළුෑ
පළඳින්නේ මුතු පබළුෑ---වළඳන්නේ කිරි මදුළුෑ

මේ කොතනින් ගෙනා ගොනා---රුහුණු රටින් ගෙනා ගොනා
මේ කුමකට ගෙනා ගොනා---කොළ මැඩුමට ගෙනාගොනා

මේ කොතනින් ගෙනා ගොනා---පිහිටි රටින් ගෙනා ගොනා
මේ කුමකට ගෙනා ගොනා---කොළ මැඩුමට ගෙනා ගොනා

මේ කොතනින් ගෙනා ගොනා---මාය රටින් ගෙනා ගොනා
මේ කුමකට ගෙනා ගොනා---කොලමැඩුමට ගෙනා ගොනා

නිමල් (ඇ එ ජ