තව්සාට වූ හදිය
===========
දැහැනින් නැගුණු තව්සා දැක කුටිය ළග
මගියෝ කියෙති යුතු වෙහෙසින් යුතුව දිග
සාමිනි අපට යා යුතු තව බොහොම මග
දෙනු මැන රැයක් ඉන්නට පංසලෙහි ලැග

අතහැර මිනිස් වාසය නිදහස පැතුව
මම මෙහි සිටින්නෙමි සිත සොම්නස යුතුව
මට ඉද පුරුද්දක් නැහැ කරදර ඇතුව
දෙන්නේ නවාතැන් කොහොමද ඉඩ නැතුව

ගොළුවන් වගේ රිංගා මුල්ලකට වෙලා
ඉන්නට හැකිය සුසුමක් වත් නැතිව හෙළා
අපි මොන තරම් සංවර වෙන්නෙමුද බලා
ඉඩ දෙනු මැනවි කී විට ඒ නඩෙහි මුලා

තව්සා කුටිය එක මුල්ලක් ඉඩ දුන්නේ
පිම්බා ලෙසින් මීයට නිහඩව උන්නේ
පැයකට පමණ පසු කවුරුත් කොදුරන්නේ
ඇතැමුන් තව්සගේ පළ වැළ ටික කන්නේ

බණ බාවනාවට කරදර ඇතිදු ඉතා
තව්සා ඉදියි මුල්ලක එරමිණිය ගොතා
මගියෝ ලැබුණු නිදහස තව දුරට පතා
තුන් මුල්ලක්ම අත්කරගෙන කරති කතා

මගියෝ සිටිති දැන් කුටියේ සියළු තැන
කතිකා කරති වියහියදම් ගමන් ගැන
මුව සම පවා තව්සා සතු පැහැර ගෙන
ඔහු රෑ තැවෙන හැටි කුටියෙන් පිටට පැන

තව්සගෙ තවුස් පිරිකර ටිකවත් නැත්තේ
කෙණ්ඩිය පත් කඩය මිදුලේ එළිපත්තේ
අදුරේ මහා කළබල ගතියක් ඇත්තේ
ඒ මදිවාට කවුදෝ ගුටි කෙළ ගත්තේ

මැසි මදුරුවන්ගේ විස දළ තුඩු පාවා
තව්සා සීතලේ රෑ සට සට ගෑවා
මගියෝ ගියහ තව්සා කුටියට ආවා
තිබුණා මිණී තුන හතරක් එහි බාවා

(සිදාදියේ කුළු මීමුන් වනාන්තරයට රිංගා ගැනීම.පී.බී අල්විස් පෙරේරා කවියාණන්ගේ මේ කවි පෙළ වැඩිපුර ප්‍රසිද්ධ නොවූ එකකි."කොළඹ යුගයේ"කවි කියවන්නට කැමති ඔබ වෙනුවෙන් උපුටා ගතිමි.)